Mijëra shqiptarë në Manhatan kremtojnë paradën tradicionale shqiptare me krenari dhe emocion

Në një atmosferë festive dhe emocionale, mijëra shqiptarë nga të gjitha trojet shqiptare dhe mërgata u mblodhën në zemër të Manhatanit, në New York, për të festuar paradën vjetore shqiptare, të organizuar nga shoqata “Rrënjët Shqiptare” (Albanian Roots).

Kjo ngjarje tashmë është shndërruar në një traditë të rëndësishme për komunitetin shqiptar në Shtetet e Bashkuara dhe më gjerë, duke shërbyer si një urë lidhëse mes brezave dhe kulturave.

Parada nisi më 21 qershor, në ora 10:00 të mëngjesit me orën lokale, nga Central Park West & 81st Street.

Flamujt kuqezi valëviteshin krenarë, veshjet popullore ndriçonin rrugët e qytetit, ndërsa këngët dhe vallet shqiptare jehonin në rrugët e New York-ut. Pjesëmarrësit përfaqësuan qytete e treva të ndryshme shqiptare nga Shqipëria, Kosova, Maqedonia e Veriut, Mali i Zi, Lugina e Preshevës dhe komunitetet arbëreshe – një dëshmi e unitetit dhe larmisë që karakterizon shqiptarët kudo në botë.

Pas parakalimit, festa vazhdoi në rrugën W 72nd Street, ku atmosfera u ndez edhe më shumë me performanca artistike, ushqime tradicionale dhe paraqitje kulturore që pasqyronin bukurinë dhe autenticitetin e trashëgimisë sonë kombëtare.

Kryetari i Bashkisë së New York-ut, Eric Adams, një mbështetës i përhershëm i komuniteteve etnike në qytet, organizoi një pritje zyrtare për përfaqësuesit e komunitetit shqiptar.

Në këtë takim miqësor, ai vlerësoi rolin e shqiptarëve në jetën sociale, ekonomike dhe kulturore të New York-ut, duke e cilësuar kontributin e tyre si shembull të integrimit dhe suksesit në shoqërinë amerikane. Ai tha:

“Komuniteti shqiptar është një pasuri për qytetin tonë. Vlerat që sillni janë të jashtëzakonshme dhe na bëjnë më të fortë të gjithëve.”

Parada shqiptare në Manhatan nuk është vetëm një festë kulturore, por edhe një mesazh i qartë i unitetit, krenarisë kombëtare dhe ruajtjes së identitetit në diasporë. Ajo organizohet çdo vit nga aktivistë dhe profesionistë shqiptarë në SHBA, të cilët punojnë vullnetarisht për të bashkuar komunitetin dhe promovuar trashëgiminë shqiptare në një nga metropolet më të njohura ndërkombëtarisht.

“Mbi tokë na mbajnë rrënjët, por larg na çon bashkimi” – është motoja e kësaj parade, që fton çdo shqiptar, kudo që ndodhet, të bëhet pjesë aktive e ruajtjes dhe promovimit të kulturës shqiptare.

Në një kohë kur diaspora shqiptare po zgjerohet e forcohet në çdo cep të botës, ngjarje si kjo në Manhatan dëshmojnë potencialin, shpirtin dhe krenarinë e një kombi që nuk i harron rrënjët, kudo që shkon./GegëToskë/